Tjöld Putins falla

Eftir að hafa lesið síðustu bók blaðakonunnar Önnu Politskovskovu, Putins Russia koma viðbrögð Putins við fyrstu pólitísku andstöðunni ekki á óvart. Í bók sinni lýsir Anna hvernig Rússlandi er í raun stjórnað í anda KBG gamla Sovétsins, þó upp hafi verið sett leiktjöld líðræðis og réttarríkis að vestrænni fyrirmynd.

Fljótlega eftir útkomu bókarinnar var hún myrt eins og svo margir gagnrýnir blaðamenn í Rússlandi þessi misserin.

Ofríki hersins og útvalinna "viðskiptamógúla" sem hafa fengið að taka sér það herfang sem þeim hentar úr rússnesku atvinnulífið, virðist algert og þessi öfl fá allan þann stuðning og fyrirgreiðslu sem nauðsynleg er til að tryggja hagsmuni þeirra, hvort sem er á vettvangi dómstóla, ríkisvalds, lögreglu eða annarsstaðar.

Það er sorglegt að fylgjast með þessu mikla ríki enn einusinni verða harðstjórum að bráð. Saga þjóðanna sem landið byggja virðist enn eiga að mótast af kúgun, spillingu og ofbeldi ríkisisns. Það eina sem virðist breytt, er að nú líta vesturlönd undan á meðan þjóðinni blæðir, enda Pútin bandamaður á bak við fín leiktjöld lýðræðis.

 

Garrí Kasparov handtekinn í Moskvu

Jón Baldvin og forystukonur jafnaðarmanna

Það var mögnuð upplifun að taka þátt í setningarathöfn landsfundar Samfylkingarinnar í dag. Hátt í 2000 samherjar samankomnir í einhverjum glæsilegasta fundarsal sem ég hef komi í og þægileg samkend, stolt og gleði lá í loftinu. Handabönd, kossar, klapp á öxl, spjall - fagnaðarfundir hvert sem litið var. Meira að segja Jón Baldvin mættur galvaskur í slaginn !

Ræða Ingibjargar Sólrúnar minnti mann síðan rækilega á hvert var erindið, annað en að njóta samvistanna við allt þetta skemmtilega fólk í þessu glæsilega umhverfi. Nestuð vönduðustu stefnumótun sem nokkur íslenskur flokkur hefur lagt fram, glansaði hún yfir svið þjóðmálanna og þau brýnu verkefni sem víða bíða úrlausna Samfylkingarinnar, greinilega þess albúin að hella sér í kosningaslaginn og breyta síðan orðum í efndir. Enn á ný sýndi hún og sannaði að hún er í allt öðrum gæðaflokk en hinir formenn flokkanna.

Ávörp þeirra Helle Thorning-Smith og Monu Sahlin, formanna systurflokka okkar í Danmörku og Svíðþjóð fullkomnuðu síðan myndina. Glæsilegir fulltrúar þess alþjóðlega og sögulega samhengis jafnaðarmannahreyfingarinnar sem Samfylkingin er hluti af. Hreyfingar sem hefur skapað velferðarkerfið í þeirri mynd sem við best þekkjum það og er grundvöllur þeirrar velsældar sem ríkir á vesturlöndum, ekki síst á norðurlöndunum þar sem hreyfing jafnaðarmanna hefur verið hvað sterkust.

Nú er þetta mikla alþjóðlega breytingarafl loksins að ná fótfestu og styrk á Íslandi. Samfylkingin er mætt til leiks kraftmeiri og betur búin en nokkru sinni fyrr og ég er sannfærður um að hún mun ná vopnum sínum. Hvort tíminn fram að kosningum dugar til að tryggja Ingibjörgu Sólrúnu forsæti í næstu ríkisstjórn verður að koma í ljós, en breytingarferlið er hafið - Íslandsdeild alþjóðahreyfingar jafnaðarmanna hóf landsfund sinn í Egilshöll í dag.

Pælum í því ! 

 

„Það þarf konu til að koma jafnaðarmannastjórn að völdum"

Stórútgerð 21. aldarinnar ?

Enn bætast fjaðrir í hatt Kaupþings og íslensku fjármálafyrirtækjanna. Óhætt að ítreka hamingjuóskirnar að þessu tilefni og rétt að minna á mikilvægi þessara fyrirtækja fyrir íslenskt samfélag nú í aðdraganda kosninga. Læt eldri pistil minn um velgengni Kaupþings nægja í þeim efnum. Manni sýnist stefna í að fjármálafyrirtækin verði stórútgerð 21. aldarinnar fyrir Íslendinga.

Stenst síðan ekki freistinguna að birta mixað auglýsingaspjald VG sem ég fann á heimasíðu félaga míns Gunnars Björnssonar. Mikilvæg áminning falin í mixinu þrátt fyrir allt.

Pælum í því !

Kaupþing 795. stærsta fyrirtæki heims að mati Forbes

Svo mælir Geir.

Í tilefni af þessari glæsilegu útkomu formanns Sjálfstæðisflokksins er við hæfi að ryfja upp þrjú af athyglisverðustu ummælum hans sl. mánuði.

Fyrst um áhugavert viðhorf hans til kvenna:

Það er ekki alltaf hægt að fara heim með sætustu stelpunni á ballinu, en önnur gerir kannski sama gagn.

Þá um kuldalegar kveðjur hans til fórnarlamba kynferðisofbeldis í Byrginu:

Auðvitað er erfitt að fullyrða að stúlkurnar hefðu ekki orðið barnshafandi hvort eð var...

Og að síðustu afstaða hans til erindis Árna Johnsen aftur á þing:

Árni [Johnsen] nýtur fyllsta trausts forystu Sjálfstæðisflokksins

Svo mælir Forsætisráðherrann.

Pælum í því !

Geir nýtur mestra vinsælda

Bera íslenskir karlar ábyrgð á mansali ?

Eftir þá heiftúðugu umræðu sem fram hefur farið hér á landi um klám og kynlífsiðnað undanfarin misseri hljóta menn að staldra við þegar fréttir berast af mansalshring í okkar nánasta umhverfi. Á Costa Brava ströndinni á Spáni, þar sem þúsundir Íslendinga hafa notið sólar og sumarils hefur eftirspurnin eftir keyptu kynlífi orðið þess valdandi að amk 40 ungar konur hafa verið hnepptar í kynlífsþrældóm og lífi þeirra rústað.

Þeir íslensku karlar sem hafa keypt sér kynlíf hjá vændiskonum á Costa Brava ströndinni hljóta að spyrja sig áleitinna spurninga þegar þeir lesa slíka frétt.

Því miður eru þessar 40 stúlkur sem frelsaðar voru á Costa Brava ströndinni á Spáni aðeins lítið brot þeirra þúsunda kynsystra þeirra sem eins er ástatt um víða um heim. Frelsun þeirra veitir okkur hinsvegar innsýn í þann veruleika sem vændið og klámiðnaðurinn byggir á - þrælahald nútímans.

Á þessu þrælahaldi nútímans bera allir þeir ábyrgð sem kjósa að næra það með eigin eftirspurn. Hvort sem kynlífið er keypt á Íslandi, Kaupmannahöfn eða Costa Brava þá eykur það efturspurnina. Mansalshringirnir eflast við hver viðskipti og fleiri konur fala í valinn.

Vegna þessa eru kaup á vændi glæpur í mínum huga en á ekkert skylt við frjálslyndi eða frjálsræði.

Örlög stúlknanna 40 á Costa Brava verða vonandi til þess að enn fleiri karlar átta sig á ábyrgð sinni.

Pælum í því !

Mansalshringur upprættur á Spáni

Skipt um skoðun.

Pétur Gunnarsson hefur grafið upp afar athyglisverða ræðu Magnúsar Þórs, þingmans Frjálslyndaflokksins, sem flutt var á yfirstandandi kjörtímabili, árið 2004. Þar hveður nú við heldur betur annan tón í innflytjendamálum en þessa dagana hjá sama þingmanni.

Ég má til með að endurbirta ræðubútinn af heimasíðu Péturs:

Mér finnast reglur eins og um 24 ára aldurinn, 66 ára aldurinn og lífsýnatökur og annað lykta af nokkurs konar nesjamennsku sem kannski má útskýra með einhverri landlægri hræðslu sem liggur í þjóðarsálinni sem sennilega var plantað þar inn þegar Tyrkjaránin stóðu sem hæst árið 1627 eða þar um bil. [...] [Kolbrún Halldórsdóttir] sagði að núgildandi lög yrðu strangari, íslensku lögin um útlendinga, þ.e. þegar þær breytingar sem nú liggja fyrir þinginu verða komnar í gegn verði íslenska löggjöfin í rauninni strangari en sú danska. Mér varð svolítið bilt við að heyra það því danska löggjöfin hefur verið mjög umdeild, það dylst engum sem fylgist með dönskum stjórnmálum að einmitt útlendingalögin og stefna danskra stjórnvalda í málefnum innflytjenda hefur verið mjög umdeild. Í Danmörku eru allt aðrar aðstæður en á Íslandi. Danmörk liggur miklu nær þéttbýlum svæðum í Evrópu og samgöngur á milli Danmerkur og annarra staða í heiminum, þaðan sem kannski kemur mikið af innflytjendum t.d. frá Afríku, Asíu, fjarlægum heimsálfum, eru með allt öðrum hætti en á Íslandi. Ísland er eyja úti í miðju Atlantshafi, það er yfir stórt og mikið haf að fara fyrir fólk sem vill hugsanlega koma hingað og fá hér aðsetur. Það er dýrt að ferðast hingað. Það eitt virkar því bara sem mikill hemill, (GHall: Enn þá.) frú forseti, á aðsókn útlendinga hingað til lands. Ég heyri að hv. þm. Guðmundur Hallvarðsson segir enn þá. Kann að vera enn þá. Ég gæti á vissan hátt tekið undir það. [...]Þá ber kannski að skilja löggjöfina núna sem svo að menn séu að reyna að byrgja brunninn áður en barnið dettur ofan í hann. En mér finnst það í raun og veru óþarfi og mér finnst þá kannski óþarfi að ganga svona langt að setja inn reglu eins og t.d. þá um 24 árin. Mér finnst það óþarfi. En nóg um það. 

Hvað ætli hafi orsaka þessi umskipti í málflutningi Magnúsar Þórs og Frjálslyndaflokksins ?

Pælum í því !

"Skorts-stefna" frjálslyndra.

Síðustu daga hef ég átt í nokkrum orðaskiptum við forystumenn Frjálslyndaflokksins á blogsíðu Jóns Magnússonar. Tilefnið var leiftursóknin gegn útlendingum sem flokkurinn hóf um síðustu helgi og þau nýju meðöl sem Magnús Þór kynnti til sögunnar í Silfri Egils.

Nú hefur Frjálslyndiflokkurinn nefnilega fundið upp nýja hagfræðikenningu sem á að segja okkur að þenslan á Íslandi sé í raun erlendu vinnuafli að kenna. Grundvöll þessarar nýju hagfræðikenningar má finna í grein sem Kristinn H. Gunnarsson skrifar á heimasíðu sinni.

Um leið og ég hvet alla til að kynna sér grein Kristins og umræðurnar á blogsíðu Jóns, birti ég hér aftur síðasta innlegg mitt í þeirri umræðu:

Grein Kristins er vissulega athyglisverð lesning. Ég leyfi mér hinsvegar að fullyrða að engann fáið þið hagfræðinginn til að skifa uppá, að þær kenningar sem Kristinn setur þarna fram minnki verðbólgu eða komi þjóðinni til góðs með einhverjum hætti.

Þarna er lögmálum hagfræðinnar beinlínis snúið á haus !

Skortur á vinnuafli leiðir til hærra verðs á vinnuafli. Hærra verð á vinnuafli leiðir til hærra verðs á framleiðslu, vörum og þjónustu. Hærra verð á vinnuafli, vörum og þjónustu leiðir síðan til hærri verðbólgu. 

Við höfum reyndar gengið í gegnum slíkst ástand undanfarin ár og vitum nokkurnvegin hvar slíkt ástand kemur fyrst niður. Sjúkrahúsin, leikskólarnir, fiskvinnslurnar, grunnskólarnir, öldrunarstofnanirnar og yfir höfuð sú starfsemi sem ekki hefur svigrúm eða möguleika til að hleypa hækkun launa beint út í verðlagið tapa í samkeppninni og lamast. Það sem hefur bjargað þessari starfsemi hingað til eru innflytjendur.

Þetta viðurkenna allir sem vit hafa á.

Ég velti því hinsvegar fyrir mér, hvort "skorts-stefnan" sem Kristinn leggur til og Magnús virðist hafa gert að sinni í tilfelli innflytjenda, eigi að verða grundvöllur Frjálslyndaflokksins almennt. Mega kjósendur t.d. eiga von á sambærilegri lausn á vanda landbúnaðarins á Íslandi ?

Mun Jón Magnússon leggja til að innflutningur á matvælum verði heftur svo íslenskur landbúnaður fái "eðlilegt" verð fyrir afurðir sínar án utanaðkomandi samkeppni ? Er ekki eðiliegt að kjöroðin "Ísland fyrir Íslendinga" eigi við um bændur eins og aðra ? Er ekki líka rétt að "draga úr þennslunni" með því að takmarka möguleika almennings á matarkaupum með hækkandi verði matvæla ? Mér er spurn!

Um eitt get ég þó verið sammála Kristni og líklega Frjálslyndaflokknum, að á endanum munu öll þjóðfélög sem vinna eftir þeim "hagfræðikenningum" sem Kristinn boðar, enda án þenslu. Þau munu brotlenda eða öllu heldur brenna upp í óðaverðbólgu og óhagkvæmni. Slíkt Ísland hygg ég að fáir vilja byggja eða heimsækja en etv finnst Frjálslyndaflokknum slík framtíð hugnanlegri en ef hér væri blómlegt atvinnulíf sem laðaði að landinu einstaklinga og fyrirtæki erlendis frá. Ef svo er, þá er "skorts-stefna" Kristins vissulega málið !

Pælum í því !

Hugsanlegt að koma manni á þing með 1% atkvæða á landsvísu

Áfram Valgerður !

 

Enn stend ég mig að því að vera sammála Valgerði Sverrisdóttur. Þessi veruleiki hefur ágerst eftir að mér í auknum mæli hefur tekist að losa mig við lærða Alþýðubandalagsfordóma æskunnar í garð atvinnulífsins og áhuginn á efnahagsmálum og viðskiptum hefur aukist.

Sem Iðnaðar- og viðskiptaráðherra var Valgerður afar umdeild, ekki síst vegna forgöngu hennar í stóriðjumálum, en mér fannst hún ávalt standa þá plikt með miklum myndarbrag. Samhvæm sjálfri sér í uppbyggingaráformunum, rökföst og öfgalaus. Ætli hún eigi ekki einhvern þátt í að koma mér ofan af þeirri rökleysu sem mér finnst allt of algeng um þessar mundir, að orkufrekur iðnaður sé einhverrahluta vegna óæskileg starfsemi - eigi amk ekki heima á Íslandi.

Eftir að Valgerður varð utanríkisráðherra tók hinsvegar steininn úr. Ég er bara sammála nánast öllu sem hún er að gera þar - finnst ég loksins hafa eignast utanríkisráðherra ! Ég verð að vísu að taka allt samningaruglið við Bandaríkin út af Keflavíkustöðinni út fyrir sviga í þessum efnum, en það má líka alveg skrifa það á reikning Geirs Haarde.

Á þeim stutta tíma sem Valgerður hefur verið utanríkisráðherra hefur hún gjörbreytt ímynd ráðuneytisins. Þar leika nú ferskir, mjúkir kvennavindar í stað þess karllæga, spillta leyndarsamfélags sem áður einkenndi ráðuneytið. Í stað hernaðarhyggju og stríðleikja strákanna, er áherslan núna á þróunaraðstoð, viðskipti og alþjóðlegt samstarf. Einmitt svona vil ég að Ísland beiti sér á alþjóðavetvangi, sem ábyrgur boðberi mannúðar og ekki síður frjálsræðis í viðskiptum. Þar höfum við eithvað fram að færa og ekkert kemur hrjáðum löndum heimsins betur en einmitt slíkt framlag af hendi hinna betur stæðari landa.

Ég vona að utanríkisráðnuneytið haldi áfram á sömu braut, hvort sem Valgerður verður þar í forsæti eða ekki. Ég held reyndar að sjónarmið hennar og þær breyttu áherslur sem hún hefur sett á dagskrá í ráðuneytinu myndu njóta sín mun betur í ríkisstjórn undir forsæti Samfylkingarinnar. Þá kæmust evrópumálin meira að segja á dagskrá líka !

Pælum í því !

130 milljónir til viðbótar í þróunarsjóð EFTA

Djarft teflt !

Þeir meiga eiga það hjá Múrbúðinni að þeir hafa teflt afar djarft í markaðssókn sinni gegn stóru byggingarvöruverslununum. Auglýsingar undanfarinna vikna hafa án efa sáð verulegum efasemdum hjá núverandi viðskiptavinum BYKO og Húsasmiðjunnar og ég hygg að öllum afsláttartilboðum þessara fyrirtækja sé  tekið með varúð þessa dagana.

Hefði hin eftirlýsta kvittun ekki komið í leitirnar, hefði sá djarfi leikur einfaldlega gert útafvið núverandi markaðsstefnu stórfyrirtækjanna - tilboðin hefðu virkað öfugt í framhaldinu. Þar með hefði Davíð lagt Golíat með sannkölluðum style.

En ein kvittun fannst og því geta BYKO og Húsasmiðjann enn haldið haus. Ég er hinsvegar viss um að þar á bæ hafa menn verið skjálfandi á beinunum og gert allt sem í þeirra valdi stóð til að grafa upp kvittanir. Ein kvittun er hinsvegar auðvitað ekki neitt, neitt og ef þær verða ekki einhverjir tugir á endanum staðfestir það fullyrðingar Múrbúðarinnar um að hin uppsettu verð séu plat. Ætli BYKO hafi ekki selt einhver þúsund af málningardósum í þessari stærð ? Og það finnst ein kvittun !!

Ég verð að viðurkenna að ég hef óskaplega gaman af því að fylgjast með svona markaðsátökum, ekki síst þegar Davíð er að slást við Golíat og tekst vel upp. Ég vona svo sannarlega að Múrbúðin uppskeri í samræmi við athyglina sem fyrirtækið hefur náð og það verður spennandi að fylgjast með næstu uppátækjum þeirra. Múskó heimasíðan er t.d. tær snilld.... Verst að maður þarf ekkert á byggingarvörum að halda þessa dagana, þá gæti maður tekið þátt og greitt atkvæði með veskinu.

Hvað ætli "Múskó" verslununum hafi oft tekist að plata mann með þessum hætti ?

Pælum í því !

 

Kvittun fyrir málningarkaupum kom í leitirnar

Enn eru VG og Sjálfstæðisflokkur sammála...

Ég held að það hljóti að vera hið besta mál að flokkarnir komi sér saman um eithvert þak á auglýsingakostnað í baráttunni sem framundan er. Það verður að vísu erfitt að framfylgja slíku samkomulagi út í hörgul, en svona samkomulag mun ábyggilega halda aftur af flokkunum á lokasprettinum og er það vel.

Það vekur líka athygli að enn eru VG og Sjálfstæðisflokkurinn sammála. Hér er að vísu ekki um hápólitískt mál að ræða, en skemmtileg tilviljun í því merkjaflóði sem flokkarnir eru að senda kjósendum og hvorir öðrum þessa dagana.

Öllu mikilvægari finnast mér umræðurnar um leynilegan fund Geirs Haarde og Steingríms J sem fjallað er um á blogsíðu Péturs Gunnarssonar. Þar fullyrðir hann að slíkur fundur hafi farið fram og rekur einnig hvernig VG reyndi í kjölfar borgarstjórnarkosninganna síðustu að komast í meirihlutasamstarf með Sjálfstæðifslokknum, öndvert við það sem sagt var opinberlega.

Sjálfur hef ég ekki heyrt af þessu fyrr, en mér finnst svar Árna Þórs Sigurðssonar ekki síður athyglisvert, enda neitar hann sögunni ekki. Á síðasta þingi Sambands Íslenskra sveitarfélga var það einmitt Árni Þór Sigurðsson, sem landaði samningum VG og Sjálfstæðisflokks um stjórn þessa mikilvæga sambands. Þar færði VG Sjálfstæðisflokknum forystu sambandsins (ígildi ráðherradóms) gegn varaformennsku Árna Þórs. Hann er því vanur að byggja brýr í þessa átt.

Pælum í því !

Auglýsingakostnaður stjórnmálaflokkanna takmarkaður við 28 milljónir