Orðaleppar rökleysunnar.

Það hefur verið fróðlegt að fylgjast með umræðunni vegna boðaðrar hingaðkomu fulltrúa klámiðnaðarins. Þjóðin virðist klofin í tvo háværa hópa og er báðum mjög mikið niðrifyrir. Annar hópurinn er alfarið á móti klámiðnaðinum og vill grípa til ýmissa ráða til að úthýsa fulltrúum hans. Hinn hópurinn virðist hinsvegar fyrst og fremst vera á móti því að vera á móti klámiðnaðnum, en ekki treysta sér til að standa beint með klámiðnaðinum. Sumir þeir sem tilheyra síðari hópnum sjá meira að segja ástæðu til að taka það skýrt fram, að þeir séu nú ekkert fyrir klám og kunni ekki að meta það sem fram fer í þeim “iðnaði”. En þeir eru engu að síður á móti því að vera á móti klámiðnaðinum og virðast telja að þjóðfélaginu stafi jafnvel meiri ógn af þeim einstaklingum sem beita sér gegn klámiðnaðinum en klámiðnaðinum sjálfum.

 

Það er einnig athyglisvert að þegar andstæðingar klámiðnaðarins leggja fram upplýsingar um þann mannlega harmleik sem virðist óumflyjanlegur fylgifiskur klámiðnaðarins er þeim rökum ekki svarað af hinum hópnum, heldur gripið til orðaleppa rökleysunnar – talað um forræðishyggju, bókabrennur, ofstæki osfrv.

 

Vita menn ekki að bein afleiðing markaðssetningar klámsins og þeirrar eftirspurnar sem hún skapar, er þrælahald nútímans ? Á hverjum degi er konum og börnum rænt, þeim misþyrmt, nauðgað, limlest og þau brotin niður andlega til að hægt sé að nýta þau í klámiðnað. Konur og börn eru seld eins og hver önnur hrávara, klámefnisframleiðenda eða vændishúsaeigenda á milli, yfirleitt þar til að þau hafa verið gjörnýtt og líf þeirra lagt í rúst eða því eytt. Vita menn þetta virkilega ekki ? Þrátt fyrir allar upplýsingarnar, heimildarmyndirnar, skýrslurnar og öll lífin sem liggja í valnum.

 

Halda menn etv að glæsilegu konurnar sem brosa til þeirra í gluggunum í Amsterdam, dansa hjá Geira á Goldfinger eða bera sig og leika “listir” sínar í klámmyndunum séu bara svona ánægðar með útlitið eða æstar í aðdáun karla að þær séu sko alveg til í tuskið fyrir smá pening ? Halda menn etv að einhversstaðar annarsstaðar séu hin vændishúsin, súlustaðirnir og klámmyndirnar þar sem vonda fólkið vinnur ? Eða halda menn etv að það breyti ekki miklu, hvort við hér uppá litla Íslandi tökum þátt í að auka eða minnka eftirspurnina eftir kláminu ? Konum og börnum verði samt rænt, þeim nauðgað og lif þeirra lagt í rúst og því geti menn allt eins notið sýningarinnar líka ?!

 

Ég veit ekki hver ástæðan er, en ég hreinlega skil ekki sjónarmið þeirra sem eru á móti því að vera á móti klámiðnaðinum. Ég skil hinsvegar að þeir treysti sér ekki til að standa með honum og get svo sem glaðst yfir því.

 

Ég skil ekki heldur hvernig menn geta tengt andstöðuna við klámiðnaðinn við forræðishyggju, bókabrennur eða galdraofsóknir og ætlast til að menn láti eins og ekkert sé þegar klámvæðingin ríður yfir. Ef baráttan snérist um það að forða neytendum klámefnis frá afleiðingum gerða sinna gætu þessar röksemdir mögulega átt við, en um það snýst baráttan alls ekki að mínu viti. Baráttan gegn klámiðnaðinum snýst um að bjarga fórnarlömbunum, hráefni iðnaðarins, konunum, börnunum, þeim þúsundum einstaklinga sem gætu átt líf fyrir höndum, en mun á næstu árum verða fórnað á altari klámiðnaðarins ef ekkert verður að gert.

 

Hópurinn sem hefur gert Hótel Sögu að griðarstað sínum í mars mun véla um örlög þessa fólks. Hversu mörg barnsrán, nauðganir eða morð skyldu verða á “afrekaskrá” þessa þings ? Getum við sagt að það komi okkur ekki við ?

 

Pælum í því !

Þjóðkirkjan og prestafélag Íslands harma klámráðstefnu

Athugasemdir

[erlahlyns.blogspot.com, 18.2.2007 kl. 11:39]

Alveg hreint sérstaklega góð grein!

[SM, 18.2.2007 kl. 11:49]

heyr, heyr.

[Grímur Kjartansson, 18.2.2007 kl. 12:16]

Línan milli kláms og nektar er mjög huglæg og hefur sannarlega verið að breytast t.d. mundi enginn kæra myndina "Táknmál ástarinnar" í dag þó hún hafi verið kærð á sínum tíma. Sumir skipta bara orðinu klám út fyrir kynþokka og þá má sýna allt.
Hlustendur Rásar 2 velja á hverju ári kynþokkafyllstu konu landsins

[Rannveig Þorvaldsdóttir, 18.2.2007 kl. 12:20]

Frábær lesning. Takk.

[Katrín Anna Guðmundsdóttir, 18.2.2007 kl. 20:21]

Takk fyrir þennan frábæra pistil Hrannar

[Gunnar Hrafn Arnarsson, 18.2.2007 kl. 23:42]

Sæll brósi.

Flott og fræðandi blogg hjá þér. 

Kveðja Gunnar Hrafn  

[Jón Valur Jensson, 21.2.2007 kl. 17:51]

Fín grein hjá þér, Hrannar, afgerandi sterkar röksemdir, og verður ekki fram hjá þeim gengið. Með góðri kveðju,

[Tinna G. Gígja (IP-tala skráð) 23.2.2007 kl. 19:23]

For fokks seik! Ég horfi á klám, og hef gaman af. Ég er á móti barnaklámi og þrælahaldi,  en dettur ekki í hug að falla í þessa ömurlegu rökleysugryfju, að halda því fram að allt klám byggist á morðum og nauðgunum. Annað hvort ertu að horfa á kolvitlaust (og kolólöglegt) klám, eða þú ert bara vitlaus. Heldurðu að allir Bandaríkjamenn séu morðingjar, bara vegna þess að þar eru flestir fjöldamorðingjar? Eru allir íbúar Kólumbíu kókaínbarónar? Eru allir múslimar hryðjuverkamenn, allir Austurríkismenn Hitler og allir Vestmannaeyingar Árni Johnsen?

Að halda því fram að allt klám byggist á nauðgunum og barnamisnotkun er fáránlegt, en fáránlegra þó að reyna að varpa ábyrgðinni á þúsundum ára af kúgun kvenna á herðar okkar sem njótum kláms.