Gunnfáni jafnaðarmanna

Það var fróðlegt og skemmtilegt að lesa sunnudagsviðtöl Péturs Blöndal í Morgunblaðinu við vinstrimennina sem nú höndla sem ráðherrar með viðskipti og fjármál á Íslandi annarsvegar og Indlandi hinsvegar. Mikill samhljómur var með þeim bræðrum í andanum Björgvini Sigurðssyni viðskiptaráðherra og P. Chidambaram, fjármálaráðherra Indlands og greinilegt að þessir forystumenn jafnaðarmanna hafa áttað sig á því að alþjóðavæðing viðskiptanna er eitt af mikilvægustu tækjunum sem við eigum í baráttunni gegn fátækt og fyrir aukinni velsæld allra jarðarbúa.

P. Chidambaram hefur verið ötull baráttumaður fyrir auknu frjálsræði í viðskiptum um árabil og rekur ævintýralegan uppgang efnahagslífsins á Indlandi til slikrar þróunar. Einn þáttur í þeirri þróun er að greiða leið fjárfestinga til og frá Indlandsmarkaði og í þeim erindagjörðum var hann einmitt staddur hér á landi. Það verður gaman að fylgjast með framhaldi þess máls.

Ég hef áður fjallað um mikilvægi alþjóðavæðingarinnar og aukins viðskiptafrelsis í baráttunni gegn fátækt í heiminum og er sannfærður um að það er ein mikilvægasta forsendan fyrir raunverulegum árangri. P. Chidambaram setur málefnið hinsvegar í þannig samhengi, þegar hann lýsir áhrifum þessarar þróunar fyrir Kína og Indland að um það þarf varla að hafa fleiri orð:

Bæði ríkin munu setja mark sitt á 21. öldina og það verður öldin þar sem 2,5 milljarðar ná sömu velmegun og Evrópa nýtur í dag

Björgvin orðar þetta hinsvegar þannig með sínum kjarnyrta hætti:

Viðskiptafrelsi er hin hliðin á jafnaðarstefnunni

Ég get tekið heilshugar undir með þeim félögunum báðum en hverjum hefði nú dottið í hug fyrir svona 20 árum að einn helsti gunnfáni okkar jafnaðarmanna á 21. öldinni yrði viðskiptafrelsið ?

Pælum í því !

Maðurinn með útvarpsröddina

Athugasemdir

[Sigurður Karl Lúðvíksson, 2.7.2007 kl. 00:46]

Já, hverjum hefði dottið það í hug. Við frjálshyggjumenn höfum talað fyrir þessu í marga áratugi og alltaf haft trú á því að þið tækuð rökum á endanum, annað gæti bara ekki verið. Verst með allt fólkið sem dó í millitíðinni.

[Heiða Björg (IP-tala skráð) 2.7.2007 kl. 10:01]

Skemmtilegur samanburður hjá þér, eitt helsta verkefni alheimsstjórmálanna ætti að vera að berjast gegn fátækt

[Sigurður Karl Lúðvíksson, 2.7.2007 kl. 10:22]

Þá bendi ég þér, Heiða, á þetta viðtal, http://nerdumdigitalis.blog.is/blog/nerdumdigitalis/entry/243174/

[Örlygur N. Jóhannsson (IP-tala skráð) 2.7.2007 kl. 10:46]

Já, það sannast hið orðkveðna, að hörðustu kommarnir verða hörðustu kapítalistarnir þegar þeir fá tækifæri til.  Ég veit ekki betur að Tryggvi Þór Herbertsson hafi verið mjög vinstrisinnaður pönkari hér á árum áður, ættaður frá gamla kommabælinu Neskaupsstað, en gerðist síðan virtur hagfræðingur og síðar bankastjóri og málsfari fyrir nokkra af kapítalistum á Íslandi.  Batnandi mönnum er best að lifa! 

[Heiða Björg (IP-tala skráð) 2.7.2007 kl. 13:32]

Ágæti Sigurður, þetta viðtal sem þú bentir mér á fjallar ekki um alþjóðavæðinguna heldur hjálp til fátækra.

Það sem mér finnst spennandi er hvernig við getum nýtt alþjóðavæðinguna til að gera fólk einmitt sjálfstæðara.  Hér á  síðunni hans Hrannars (vinstra megin undir alþjóða og efnahagsmál) er einmitt  linkur á síðu Endum fátækt - eflum viðskipti sem þú ættir kannski að kynna þér ? Að mínu viti er fáránleg hugmynd að við lokum augunum fyrir þessu stóra vandamáli, þá fyrst færi fólk að deyja ! það þarf að finna leið og við lestur þessarar bókar finnst manni opnast leið . .. vonandi.

Annars skil ég ekki þetta kommúnistatal hjá Örlygi, hefur sennilega átt að lenda á annari síðu, amk hef ég ekki séð neina kommúnista skrifa hér hvorki pistla né athugasemdir ?

[Sigurður Karl Lúðvíksson, 2.7.2007 kl. 16:02]

"Skemmtilegur samanburður hjá þér, eitt helsta verkefni alheimsstjórmálanna ætti að vera að berjast gegn fátækt "

Gæti verið eðlilegur misskilningur hjá mér, en ég held ekki.

Við erum sem betur fer nokkuð sammála um þetta Heiða. Vandamálið við að fara eftir því sem Shikwati segir í viðtalinu er að við erum þegar búin að mála okkur út í horn með því að fara ekki eftir frjálshyggjunni strax frá byrjun. Nú er innviði matvælaframleiðslu í Afríkuríkjum í rúst vegna þess að þeir geta ekki keppt við gefins matvæli, þannig að með þessari æðislegu hjálp okkar erum við búin að herða snöruna um háls þeirra. Shikwati leggur til að við látum bara gossa og vonum að snaran slitni hjá sem flestum. Þetta tekur skamman tíma, en með einhverju mannsláti svo sannarlega. Það væri auðvitað líka athyglisvert að skoða hvernig við getum losað hnútinn sem félagshyggjan er búinn að hnýta, rólega, eins og þú leggur til. Spurningin er hvort það bjargi fleirri eða færri mannslífum, því það gerist miklu hægar.

[Gunnar Th. Gunnarsson, 2.7.2007 kl. 22:55]

Þetta hafa frjálshyggjumenn boðað í áratugi og ekkert nema eðlilegt að fleiri fylgi í kjölfarið. Kratar á Íslandi teljast varla vinstrimenn þó þeir skreyti sig því heiti á tillidögum í stjórnarandstöðu. Kratar hér kalla sig líka frjálslynda jafnaðarmenn sem sjálfstæðismenn gætu eflaust kallað sig líka, upp að vissu marki, en að jafna laun þarf ekki að þýða bætt kjör. Það þarf hins vegar alltaf að tryggja jafna möguleika og almannatryggingakerfið þarf að vera sterkt. Hins vegar eru hinir eiginlegu vinstrimenn auðvitað í VG og þeir berjast með kjafti og klóm gegn glóbaliseringunni og vilja að ríkisvaldið standi í atvinnurekstri. Allt hugsandi fólk þarf að kveða þá vitleysu niður.

[Heiða Björg (IP-tala skráð) 3.7.2007 kl. 11:28]

Við erum sennilega sammála og ósammála  Sigurður Karl,  sú leið sem þú vilt fara er frjálshyggjuleið - þ.e hætta öllum afskiptum látum þá redda sér sjálfa. Ég er jafnaðarmaður  og vil hjálpa þeim að hjálpa sér sjálfum. En þetta er spennandi verkefni fyrir heiminn að takast á við , við hljótum að geta leyst þetta í sameiningu !

Þeir sem berjast gegn alþjóðavæðingunni hljóta að verða undir ! Ég sé alþjóðavæðinguna sem mikilvægan þátt í baráttunni gegn fátækt

[G. Tómas Gunnarsson, 5.7.2007 kl. 04:44]

Það er auðvitað rétt og sjálfsagt að fagna því að vinstri menn skuli í auknum mæli aðhyllast viðskiptafrelsi.  Þó þykir mér sá Björgvin sem nefndur er hér að ofan ekki vera gott dæmi um það, því miður.

Mér virðist því miður oft vera stutt í gamla "Allaballan" í honum, sem kom til dæmis í ljós þegar hann vildi ekki aftaka að setja kynjakvóta í stjórnir fyrirtækja, sem tekur þá frelsi af þeim sem hætta fé sínu í hlutafélögum til að kjósa eins og þeim þykir best henta hverju sinni.

Slíkt er ekki viðskiptafrelsi.